ზაფხული ის სეზონია, როდესაც დროის მდინარება ნელდება, ქალაქის ქაოტურ ხმაურს აზვირთებული ტალღების ან მთის გრილი სიოს შრიალი ანაცვლებს და ჩვენც, როგორც იქნა, ვიცლით იმ უმთავრესი სიამოვნებისთვის, რომელიც წიგნების შერჩევას, გემრიელად მოკალათებასა და ლიტერატურის მშვენიერ სამყაროში ჩაძირვას ახლავს.
uBooks-ის ციფრულ თაროებზე სწორედ ასეთი, ესთეტიკურად და შინაარსობრივად სრულყოფილი წიგნები შევარჩიეთ. არ აქვს მნიშვნელობა, სად ატარებთ ზაფხულს – მზისგან გახურებულ ქვიშაზე, მყუდრო კაფეში თუ მთის კოტეჯის ტერასაზე – ეს 10 ინგლისურენოვანი გამოცემა თქვენს ზაფხულს განსაკუთრებულ ელფერს შესძენს.
"The Great Gatsby" — F. Scott Fitzgerald
(Penguin Clothbound Classics)
ზაფხული და ფიცჯერალდი განუყოფელი ცნებებია. ლონგ-აილენდის ცხელი, დეკადენტური საღამოები, ჯაზის ჰანგები და აუხდენელი ოცნებები – ეს ისტორია არასოდეს ძველდება.მილიონერი ჯეი გეტსბი წლების განმავლობაში ეძებს დაკარგულ საყვარელ ქალს და სჯერა მისი ერთგულებისა. იპოვის კიდეც, მაგრამ იგი ამ დროს უკვე სხვისი მეუღლეა, ერთი ქარაფშუტა ქალი, თუმცა კი შეყვარებული გეტსბისთვის ისევ ერთადერთი და განუმეორებელი. ჯეი არაფერს იშურებს მისი გულის მოსაგებად… როგორ მთავრდება იმ კაცის სიყვარული, რომელსაც თან ყველაფერი ჰქონდა და თან – არაფერი? „დიდი გეტსბი“ იმ რომანებს განეკუთვნება, მართლაც ერთი ამოსუნთქვით რომ იკითხება, მაგრამ ბევრ საფიქრალსაც ტოვებს.
"Normal People" — Sally Rooney
სალი რუნის ეს ბესტსელერი თანამედროვე კლასიკად უკვე იქცა და ის იდეალური საზაფხულო საკითხავია მათთვის, ვისაც შვებულებაში ემოციური, რეალისტური და ღრმა ფსიქოლოგიზმით სავსე პროზა იზიდავს. რომანის მთავარი გმირების, მარიანისა და კონელის ურთიერთობას გამუდმებით თან სდევს გულგატეხილობა, სინანული, მონატრება, ბრაზი, სასოწარკვეთილება, მოსალოდნელი შეხვედრის სიხარულისგან გამოწვეული მღელვარება… ამ რთულ და უსასრულოდ გრძელ გზაზე სწავლობენ, რა არის სექსი, ძალაუფლება, ტკივილის მიყენების ვნება და აღტაცება იმის გამო, რომ ვიღაცას უყვარხარ და გიყვარს.
"Troubling Love" — Elena Ferrante
ჭეშარიტი ლიტერატურის მოყვარულთათვის ელენა ფერანტეს სადებიუტო რომანი ნამდვილი აღმოჩენა იქნება. ეს არის მძაფრი, ინტიმური და ფსიქოლოგიური დეტექტივი დედისა და ქალიშვილის რთულ, ფარულ კავშირებზე. ენ გოლდსტეინის ბრწყინვალე ინგლისურენოვანი თარგმანი ზუსტად გადმოსცემს ფერანტეს უნიკალურ, უცნაურად მომნუსხველ და დაძაბულ სამყაროს.
Sold out
"Eileen" — Ottessa Moshfegh
თუ ზაფხულის მცხუნვარე დღეებში მკვეთრი კონტრასტი გსურთ, ოტესა მოშფეგის ეს ფსიქოლოგიური თრილერი იდეალური არჩევანია. სიუჟეტი 1960-იანი წლების ახალ ინგლისში, ზამთრის სუსხიან დღეებში ვითარდება და ციხის ახალგაზრდა თანამშრომლის, აილინის პირქუშ და მარტოსულ ცხოვრებაზე მოგვითხრობს, რომლის ცხოვრებასაც ერთი უცნაური მეგობრობა თავდაყირა აყენებს. მოშფეგის გამორჩეული სტილი, შავი იუმორი და ოსტატური თხრობა დაუვიწყარ ლიტერატურულ თავგადასავალს გპირდებათ.
"Big Sur" — Jack Kerouac
ბიტნიკური ლიტერატურის მეფის, ჯეკ კერუაკის ეს რომანი წყნარი ოკეანის სანაპიროს, კალიფორნიის ველური ბუნებისა და ადამიანის შინაგანი კრიზისის საოცარი სინთეზია. მისი ცნობილი, ჯაზური იმპროვიზაციით ნაწერი “ცნობიერების ნაკადი” ორიგინალის ენაზე სულ სხვა რიტმით გითრევს — გრძნობ ოკეანის ტალღების ხმას, ნისლს და თავისუფლების იმ მძაფრ სურნელს, რომელიც მხოლოდ კერუაკის ტექსტებს ახასიათებს.
Sold out
"Amsterdam" — Ian McEwan
ბუკერის პრემიის ლაურეატი ეს მოკლე რომანი იან მაკიუენისგან შავი იუმორისა და ბრიტანული ირონიის შედევრია. ორი ძველი მეგობრის — წარმატებული კომპოზიტორისა და გაზეთის რედაქტორის — შეთანხმება ცივ, რაციონალურ და მოულოდნელი ფინალით დაგვირგვინებულ ისტორიად იქცევა. მაკიუენის დახვეწილი, არისტოკრატიული და ინტელექტუალური ინგლისური სტილი ნამდვილი სიამოვნებაა მათთვის, ვინც პროზაში სიზუსტესა და სარკაზმს აფასებს.
"Happy Place" — Emily Henry
მათთვის, ვინც წიგნებში უდარდელ და მზით სავსე “Beach Read” განწყობას ეძებს. სიუჟეტი მეინის სანაპიროზე ვითარდება და მეგობრების ჯგუფზე გვიყვება, რომლებსაც საერთო საზაფხულო ტრადიცია და წარსული სიყვარული აკავშირებთ. ემილი ჰენრის დიალოგები იმდენად ცოცხალი და მახვილგონივრულია, რომ წიგნი ერთი ამოსუნთქვით იკითხება.
"Someone Else's Shoes" — Jojo Moyes
ჯოჯო მოიესის ეს რომანი ზაფხულის დღეებს ფერებითა და ენერგიით აავსებს . სპორტულ დარბაზში იდენტური ჩანთების შემთხვევითი არევა ორი სრულიად განსხვავებული ქალის ცხოვრებას მოულოდნელი მიმართულებით ცვლის. მოიესისთვის ჩვეული ბრიტანული იუმორი და ცოცხალი დიალოგები ორიგინალის ენაზე საოცრად კეთილხმოვნად იკითხება – ეს წიგნი იდეალური არჩევანია მათთვის, ვისაც ლიტერატურისაგან სუფთა, კინემატოგრაფიული სიამოვნება, მსუბუქი იუმორი და ესკაპიზმი სურს.
"Thinking, Fast and Slow" — Daniel Kahneman
ვინ თქვა, რომ საზაფხულო საკითხავი მხოლოდ მსუბუქი მხატვრული პროზა უნდა იყოს? ნობელის პრემიის ლაურეატის ეს წიგნი ზაფხულში ინტელექტუალური ინვეტსიციის საუკეთესო საშუალებაა. კანემანი საოცარი აზარტითა და მარტივი მაგალითებით აშიშვლებს ჩვენს ფსიქიკას და ყოველდღიურ არჩევანსა და ბიზნესს სულ სხვა თვალით გვაჩვენებს.
"Men Without Women" — Haruki Murakami
მურაკამის მოთხრობების ეს კრებული საუკეთესო კომპანიონია მელანქოლიისა და ნოსტალგიის მოყვარულთათვის. ჯაზი, ბარები, მოულოდნელი შეხვედრები და კაცები, რომელთა ცხოვრებიდანაც ქალები გაქრნენ. მურაკამისეული მინიმალიზმი ინგლისურ თარგმანში საოცრად მელოდიურად იკითხება და იდეალურად ერგება ზღვისპირა საღამოებს.
